مفالات واراء حرة

مصر وكورونا واعلانات مصر فى رمضان

مصر وكورونا واعلانات مصر فى رمضان

بقلم: نورا عواجه

من نعم ربنا عليا انى مشاهده غير جيده لمسلسلات رمضان.
والوقت ال بقعد فيه شويه قدام التليفزيون بيكون ٩٠٪ منه أعلانات،
وال يشوف مسلسلات وأعلانات مصر فى رمضان .. بعيد عن الاستفزاز وحرقه الدم وقلة الادب ، قلبه يوجعه ويبكى بدل الدموع دم ، أعلانات مصر فى رمضان هى التسول
مهما تنكر فى صور مختلفه ، حاجه مقززه ومستفزه بكل ما تحمل الكلمه من معانى ؛ لانها بتحسسنا بمدى الانحدار إللي وصلناله
اعلانات ومسلسلات رمضان مع الاسف محصوره بين حاجتين .

فقرا معدومين ، واغنياء بطرانين
ولامجال ولا مكان (للطبقه الوسطى) ال أختفت بقدرة قادر من الحياه ومن الدراما أيضا، كل حاجه بتتعرض على الشاشه دلوقتى مع الأسف صادقه لدرجة “الوجع” فى بلد كاذبه لدرجه (القرف) مع الاعتذار عن اللفظ.
الإعلانات اللى خلت كل واحد فينا يتمنى من قلبه ويقول بلسانه ( أنا عاوز أسكن فى مصر اللي فى الاعلانات ).

بس مع الاسف ((مش هى دى مصر ياعبله))
مصر الاعلانات للصفوه والمحظوظين !!
للناس الغنيه اللي كل يوم وكل ساعه بيزيد غناها !!
فى الوقت اللي الفقير فيه كل ساعه بيزيد فقره !!
مصر مفيهاش وسط مع الأسف
ومش عارفين هنفضل كده لحد أمتى ؟!

الوقت اللي فيه 100 فنان وفنانه بيقبضوا مليارات فى أعلانات ومسلسلات غير هادفه ولا واقعيه بالمره ، فى ملايين مش لاقيه تاكل بمعنى الكلمه ، وفى الوقت اللي رامز جلال بيرعب ضيوفه ، ويقبضوا ملايين برضوا (علشان يمثلوا الخوف والرعب بإتقان )
فى ناس مرعوبه بحق وحقيقى بس من “المرض” لأنهم مايملكوش تمن الدوا ، ومن الجوع
لأنهم مش عارفين بكره هيأكلوا ولادهم منين !!
كفايه أستخفاف وأستهتار ، واستفزاز للغلابه ، كفايه متاجرة بهموهم وأوجاعهم . سيبوا الناس فى حالها ، الناس فيها اللي مكفيها، وماشيه بتكلم نفسها قسما بالله .

كفايه عليهم كورونا والاضرار ال حصلت بسببها ووقف الحال ال مش عارفين هيستمر لحد أمتى ،
كل الدول بترفع حالة الطوارىء القصوى فى الأزمات وبتحاول تخفف عن المواطن لغاية الوضع مايتحسن الا مصر !! فى عز الازمه والضيق وقلة الشغل والحيله تلاقى كل يوم ضريبة جديده على بيتك وعربيتك وأرضك وفلوسك ومراتك وعيالك والهواء ال بنتفسه
كفايه كده ؟! لا ازاى !!

ينزل عليك فيضان التبرعات.
الحكومه عوزانا نتبرع لكل حاجه ولأي حاجه، من أول صبح على مصر بجنيه ، وصندوق تحيا مصر، لحد مجدى يعقوب ، والاورمان ، ومصر الخير ، ورساله، ومستشفى57357، وبنك الطعام، و500500
وغيرها وغيرها، فى الوقت اللى ال أغلب السلع الضروريه زادت من غير أدنى إحساس بمعدومى ومحدودى الدخل. وحسبنا الله ونعم الوكيل.

وبعد كده يطلعلك واحد شبعان عنده شقه فى icity -ولا التجمع (وبيلبس قطونيل) ومعندوش فكره عن الغلابه ولا المحتاجين ، يقولك (ان مصاريف موائد الرحمن تفتح مصنع).

سيادتك سيبت كل حاجه فى البلد، ونسيت المليارات اللي أتصرفت على الاعلانات والمسلسلات الفاشله معدومه الهويه.
اللي كل حصليتها فى الاخر
(تسريحه شعر ، ودقن طويل ، ولبس يعلم بيه ربنا يبقى قدوه وموضه لشبابنا الضايع ) وقيم ومبادىء كل يوم بتنهار عن اليوم ال قبله ، المسلسلات ال بتبيح للبنت تبيع نفسها وشرفها بكل بساطه لانها فقيره (مين ال خلاها فقيره ؟!) وماشوفتش غير موائد الغلابه !! اللي أنت وأمثالك متعرفوش عنهم حاجه ، أنتوا متعرفوش غير المصايف والفيلا ام 3 جناين و الكومباوند ، وموسي كوست ، والقطاميه ، ومعمار المرشدى.

متعرفوش غير أنكم تحرقوا دمنا بكل استخفاف بأوضاعنا الماديه وتخيرونا بين زاد التجمع ولا الشيخ زايد فى أعلان لكريم عبد العزيز ونيلى كريم ويسرا وشوية شباب
يحسسك أن كل مشكلتك فى الحياه هى الاختيار مش أكتر (بتهزر بتهزر )
فى الوقت ال مليون شاب وشابه فسخوا خطوبتهم وضاع حلمهم انهم يتجمعوا فى الحلال بسبب أوضتين وصاله( ايجار) مش عارفين يجيبوا ايجارهم منين

وبعد كل الهم التقيل ده ، المواطن مطالب أنه يعالج المرضى، ويوصل الميه، ويعمل كراتين رمضان للغلابه، ويتبرع بدمه، وهدومه وحياته لو لزم الامر .
وعلى فكره الغلابه بتتبرع بال تقدر عليه
عارفين ليه؟!!
لانها( مش بتهون غير على الغلبان)

فى الوقت اللي الحكومه ملزمه إنها تعمل كل ده ، ولما تتكلم عن المليارات اللي بتتصرف على الإعلانات والمسلسلات
يقولك بتناقش الواقع !
حضرتك لو المليارات دى أتصرفت
على الغلابه والمحتاجين والعيانيين
ساعتها بس مش هتناقش الواقع..!!
لا …دى هتغير الواقع ، هتغيره للأحسن ، وساعتها كلنا هنعيش فى مصر ال بنشوفها فى الاعلانات ..

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى