مفالات واراء حرة

كورونا وعويس وفتاة المعادى

كورونا وعويس وفتاة المعادى

بقلم نورا عواجه

 

من فتره كبيره مش عارفه ولا قادره اكتب اى مقالات . بالرغم من الافكار والمواضيع الكتير ال فى دماغى..
لكن ال حصل مع مريم فتاة المعادى زى ما وجع قلوب كتير

وجع قلبي انا كمان ولقيت نفسي بكتب الكلمات دى ..
لانى حسيت بكمية الغضب ال ماليه صدور الناس بالنسبه للشباب ال كانوا السبب فى موت مريم
مااشبه اليوم بالبارحه !!
لما مات عويس ابن الاقصر على يد ظابط بوليس لمجرد انه رفض ان ابوه يتهان..
ساعتها كل الناس كانت غضبانه وبتغلى وبتطالب بالقصاص..

وانا لا هتكلم عن سلوك الشباب ال كانوا السبب فى موت مريم
البنت المحترمه المؤدبه المحجبه ال ماشيه فى امان الله مطمنه واهلها فى انتظارها ،
ولا هطالب بالقصاص ولا الاعدام ليهم ولكل واحد زيهم ،
ولا هتكلم عن وجع قلب امها وابوها واهلها واصحابها وحسرتهم عليها ،

ولا هتكلم عن غضب ملايين
بسبب المهاذل ال بتحصل كل يوم
بسبب انعدام الادب والاخلاق والدين اولا
ولا هتكلم عن اولياء امور خلفوا عاهات وحيوانات وسيبينهم يدمروا فى حياة ابرياء ملهمش ذنب..
ولا هقول حرام الشباب ال راح من غير ذنب وراحت معاهم فرحة اهاليهم
ولا هقول لكل واحد فى سلطه بيستغلها اسوء استغلال اتقى ربنا
ولا هطالب بتغيير القوانيين واطالب بالاعدام فى ميدان عام لكل متحرش وحرامى ومغتصب
وكان سبب خوف ورعب للناس
لانى هبقي بنفخ فى قربه مقطوعه
انا بس هسأل كام سؤال ..
احنا عوزين يحصل ايه تانى اكتر من ال شفناه مع فيروس كورونا ؟!

هيحصل ايه اكتر من فراق حبايبنا
واحنا مش قادرين حتى نلمسهم ونودعهم ،
ولا حتى نحضن العايشين منهم ونواسيهم ؟!

هيحصل ايه اكتر من الخوف والرعب ال عشناه والاكتر لو حد مننا عطس او كح او حرارته عليت ..؟!
هيحصل ايه اكتر من الدنيا ال وقفت حوالينا من قلة الشغل والحيله وفى ناس مكنتش لاقيه تاكل حرفيا…
والاكتر بيوت ربنا ال اتقفلت فى وشنا !!
هيحصل ايه اكتر من حبستنا بالشهور فى بيوتنا مش عارفين ولا قادرين نعمل حاجه ؟!
اشمعن وقتها كنا عارفين ربنا وفاكرينه ومش بنقوم من على سجادة الصلاه ومش بنبطل نقول يارب ؟!
هو احنا لازم نعيش فى رعب طول الوقت علشان نفتكر ربنا

لازم نفضل فى حالة طؤارى دايما
علشان نخاف على بعض ونحمى بعض..
كورونا لسه موجوده وممكن لا قدر الله المره دى تكون بصوره اصعب
ياترى ساعتها هنعمل ايه …؟!

أُذكر نفسي اولا ، وكل واحد مش بياخد عظه من رسايل ربنا ومش عاوز يندم قبل فوات الاوان
بقوله تعالى..

وَإِذَا مَسَّكُمُ الضُّرُّ فِي الْبَحْرِ ضَلَّ مَن تَدْعُونَ إِلَّا إِيَّاهُ ۖ فَلَمَّا نَجَّاكُمْ إِلَى الْبَرِّ أَعْرَضْتُمْ ۚ وَكَانَ الْإِنسَانُ كَفُورًا (67)
سورة الاسراء.
وقوله ايضا فى سورة يونس

(21) هُوَ الَّذِي يُسَيِّرُكُمْ فِي الْبَرِّ وَالْبَحْرِ ۖ حَتَّىٰ إِذَا كُنتُمْ فِي الْفُلْكِ وَجَرَيْنَ بِهِم بِرِيحٍ طَيِّبَةٍ وَفَرِحُوا بِهَا جَاءَتْهَا رِيحٌ عَاصِفٌ وَجَاءَهُمُ الْمَوْجُ مِن كُلِّ مَكَانٍ وَظَنُّوا أَنَّهُمْ أُحِيطَ بِهِمْ ۙ دَعَوُا اللَّهَ مُخْلِصِينَ لَهُ الدِّينَ لَئِنْ أَنجَيْتَنَا مِنْ هَٰذِهِ لَنَكُونَنَّ مِنَ الشَّاكِرِينَ (22) فَلَمَّا أَنجَاهُمْ إِذَا هُمْ يَبْغُونَ فِي الْأَرْضِ بِغَيْرِ الْحَقِّ ۗ يَا أَيُّهَا النَّاسُ إِنَّمَا بَغْيُكُمْ عَلَىٰ أَنفُسِكُم ۖ مَّتَاعَ الْحَيَاةِ الدُّنْيَا ۖ ثُمَّ إِلَيْنَا مَرْجِعُكُمْ فَنُنَبِّئُكُم بِمَا كُنتُمْ تَعْمَلُونَ (23)..
صدق الله العظيم
والسلام …

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى