الشعر

"كانت متل زهرة" د . ملك محمود الأصفر

كانت متل زهرة
…………………………….
كانت متل زهرة بحوض الليلكي
بتضوي متل نجمة بليلة حالكة
وتبقى بجنبي نمشي عدروب الهوى
ضما لقلبي ويعلا صوت التكتكة
ونعلي فوق الغيم لحدود السما
عيني بعينا وإيدا بإيدي ماسكة
نهمس كلام الحب ونرفرف سوى
ونبني لعرش الحب أجمل مملكة
……………………………
وكانت متل زهرة بعمر السوسنة
تضحك لنور الشمس وللحلم الهني
تغرد متل عصفور ونسافر سوى
ونوصل لأبعد نجم عحدود الدني
وقلا أنا بفديكي يا عمري أنا
يا حلوتي يم الخدود ملونة
إنتي الهنا وإنتي أنا وكل المنى
ورفيقتي إنتي بدرب الولدنة
…………………………
وكنا سوى نتمشى بضو القمر
نحكي عن الأشواق ويطيب السهر
ولما جفن هالعين ينعس نتكي
ونغمض العينين تا يطل السحر
ونركب شراع الليل والحب الهني
ونسافر بهالليل مع أجمل صور
وقلا يا أجمل حلم بكل الدني
إنتي الأميرة ودرة من أحلى الدرر

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى