ثقافاتقصص

قُصيصة….. فيه حظر تجوال يا ستى

قُصيصة….. فيه حظر تجوال يا ستى

كتب – محمد حمدى
أطاطا : يا عوكل! يا عوكل! يا عوكل! هو فين المنيل؟! يا عوكل!
عوكل : أيوه يا ستى.
أطاطا : هات سيجارة!
عوكل : السجاير إللى معايا خُلصت..
أطاطا : هات سيجارة ياواد!
عوكل : يا ستى ،والله مفيش سجاير! الحال واقف اليومين دول!
أطاطا : طول مَ إنتَ بتحوش عنى السجاير ؛ربنا مُش هيكسبك!
عوكل : فيه حظر تجوال ياستى!
أطاطا : هُم الألمان بيضربوا الإنكليز فى الشارع لسه؟!
عوكل : يا ستى إحنا فى سنة 2020م،مُش فى الأربعينيات أيام الحرب العالمية التانية!
أطاطا : السنين عدت بسُرعة كِدا وإحنا مُش حاسين!
عوكل : أنا ماشى؛رايح أنام!
أطاطا : هتفضل قاعد كِدا فى البيت يا واد؛ياواد إنتَ ريحتك طلعت مِن كُتر القعدة فى البيت…
عوكل : فيه فيرس كاسح نُص الكُرة الأرضية الشمالى!
أطاطا : ليه هو هِتلر النازى بتاع ألمانيا؟!
عوكل : دا فيرس ،إسمه كورونا!
أطاطا : إسمه كورونا؟!
عوكل : أه!
أطاطا : طب لو مكنشى إسمه على إسم الشوكولاتة ،كان عمل إيه ؟!
عوكل : ربنا قادر على كُل شئ!
أطاطا : المصايب دى ؛بسبب الناس إللى زيك!
عوكل : أنا عملت إيه بس؟ دا معلمى لسه واكل عليا عشر أيام!
أطاطا : ربنا مسلط عليك إللى أقوى مِنك!
عوكل : كُل إما تشوفى وشى تسمعينى الكِلمتين دول!
أطاطا : علشان بتحوش عنى السجاير!
عوكل : بلاش سجاير؛علشان صِدرك ياستى ، الفيرس بيجى على إللى بيشربوا سجاير! وأنا مُش شاربها تانى ؛علشان صِدرى، وعلشان الفلوس!
أطاطا : مالو صدرى ؟! مالو صدرى ؟! صدرى دا مرضع نُص الحارة!
عوكل : أنا قايم أعمل شوية تمارين،وأكُل شوية خضروات ؛علشان المناعة! بدل القعدة النكد دى ؛إللى بتضعف المناعة!
أطاطا : وتبقى إستحمى يا معفن؛ دا إنتَ ريحتك ملت الشقة!قال مناعة قال!
عوكل : أنا لسه مستحمى؛علشان الدورة الدموية تنشط،وشارب مشروب سُخن!
أطاطا : كُنت هاتلى كوباية يا معفن! هو مين إللى كان قاعد معايا؟! يا عوكل! يا عوكل! فين الموكوس بن الموكوس؟!

 

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى