تقارير وتحقيقات

 صدى مصر والنجم عمرو عبد العزيز مستنى لمبتى تنور قريب

 صدى مصر والنجم عمرو عبد العزيز مستنى لمبتى تنور قريب

حوار- اشرف سركيس
النجم عمرو عبد العزيز اهلا بيك فى حوار من القلب وبجد فى ناس كتير تهمها تعرفك اكتر عن قرب
س- عرفنا بيك بسرعة وفى كتير من الناس بتقولك وحشتنا انت فين
ج- اهلا بيك وبالقراء الافاضل وكل سنة وانتم طيبين وبصحة وسعادة وانا موجود ومعرفش ليه السينما زعلانة منى ومخصمانى مع انى بحبها وعمرى ما زعلتها وانا خريج اداب قسم مسرح تمثيل واخراج وكنت الاول على الدفعة
س- عاشق للفن ومعجون بحب المسرح من يومك ومنذ طفولتك احكلنا بقا عن تجربتك فى الاخراج وانت لسه فى الاعدادية واية قصة مسرحية ملك الغابة وحكايتها
ج- حصل بالفعل كنت فى الصف الثالث الاعدادى واخرجت مسرحية ولم اقم بالتمثيل فيها وكررت التجربة مرة اخرى فى الجامعة ولم اقم بالتجربة بعد ذلك
س- مفيش حد فينا ينسى دورك الكوميدى مع الزعيم فى فيلم مرجان احمد مرجان احكلنا ازاى تم ترشيحك وايه اللى استفدته من النجم عادل امام وايه اللى تفتكره من كواليس الفيلم ده وليه متككرش تانى تكون موجود معاه
ج- شرف ومتعة وتجربة بالفعل رائعة وانا اترشحت عن طريق النجم عادل امام نفسه للدور وهو صاحب فضل كبير عليا بعد ربنا واول بوستر شال صورتى كان مع الزعيم عادل امام واتمنى الاقى فرصة للعمل تانى مع الاستاذ عادل امام
س- قمت بشخصيات كتيره جدا منها الضابط اليهودى والنصاب والدكتور والساحر وسائق التاكسى ايه بقا الدور اللى حسيت انه كان سبب شهرتك وايه الشخصية اللى نفسك تعملها
ج- دور طارق النصاب فى مسلسل نونه الماذونة ودور بونبون للاطفال فى المسلسل التلفزيونى اللص والكتاب ودى من الادوار الكوميدية اللى سابت اثر فى نفوس المشاهدين ونفسى امثل او الاقى فرصه فى القيام بالادوار السيكوباتية كتجربة جديدة بعيد عن الكوميدى والتراجيدى
س- بصراحة انا محتار مش عارف اصنفك كوميدى ولا لايت ولا تراجيدى لانك ممثل بمواصفات خاصة فامتى عمرو عبد العزيز ياخد دور بطوله مطلقة وانت تستحق ذلك وعن جدارة
ج- دور البطولة المطلقة لا يشغلنى ومش فى حساباتى وهيحجمنى فى عمل واحد فقط طول السنة وانا طموحى ابقى جوكر العب اكبر عدد من الادوار فى اقل وقت واشارك فى الادوار المتنوعة وانا ممثل ومبحبش اصنف نفسى والممثل الشاطر يؤدى كل الادوار ولعبت الكوميدى والتراجيدى والتاريخى وغيرها من الادوار المختلفة
س – عملت مسرحيات كتيرة بس للاسف معظمها لم يتم اذاعته على التلفزيون فقولنا واحكلنا عن اهم المسرحيات اللى ترشحها للناس انها تشوفها ولو على اليوتيوب
ج- فى مسرحية اسمها ولاد اللذينة تاليف العملاق اسامة انور عكاشة وبطولة الرائع محمود الجندى ويوسف داود وايمى سمير غانم وبانصح الناس بمشاهدة مسرحيتى المقام العالى على اليوتيوب وهيستمتعوا بيها
س – فين عمرو عبد العزيز من مسلسلات رمضان وليه مشفنكش فى اعمال سابت بصمة زى خيانه عهد او البرنس للنجم محمد رمضان وامتى هنشوفك فى دائرة اهتمام المخرجين الكبار زى محمد سامى او سامح عبد العزيز وغيرهم
ج- انا موجود ويزيدنى شرف العمل مع قامات زى المخرج محمد سامى وانا اشتغلت سابقا مع المخرج سامح عبد العزيز وانا موجود ومش عارف الازمة فين
س – ناس كتير شايفه ان مكانك موجود فى كل الاعمال الفنية والمفروض تبقى زى الفنان ادوار وبيومى فؤاد لانك بتمتلك كاريزما خاصة وقدرة لتقمص كل الشخصيات
ج- انا عندى يقين ان كل ممثل له وقته وان توفيق ربنا هو الاساس وادوار وبيومى فواد اجتهدوا وتعبوا وربنا عوضهم بالخير
س- ايه رايك فى الافلام اللى بتتقدم فى السينما خلال الفترة الاخيرة وشايف ايه الحل لانقاذ السينما ويكون عندنا على الاقل ما لا يقل عن 15 فيلم سينمائى سنويا
ج- فى افلام رائعة زى فيلم صاحب المقام لسه شايفه وبشكر جدا الكاتب ابراهيم عيسى واحمد السبكى المنتج على انتاج فيلم رائع زى ده وللاسف فى ازمة فى المنتجين وكتاب القصص السينمائية
س – ليه متفكرش وانت عندك خبرات مسرحية كبيرة فى تكرار تجربة النجم اشرف عبد الباقى وعمل ورش فنية للشباب الواعدين ويكون عندنا اكتر من مسرح
ج- بشكر النجم اشرف عبد الباقى اللى كان سبب فى رجوع المسرح مرة تانية وفى دلوقتى العديد من المشروعات الفنية لعدة فرق مسرحية جديدة واتمنى من المنتجين انهم يهتموا بالمسرح لان تكاليف الانتاج بتبقى مكلفة
س- انا عارف انك عاشق للاطفال ليه مفكرتش تقدم برنامج بفكرة جديدة للاطفال زى النجم احمد حلمى وغيره من النجوم
ج- لسه عامل فيديو حقق مشاهدات عليه بشرح فيه فكرة برنامج للاطفال بانهم يحلموا بالمهنه اللى نفسهم فيها ويتعرفوا عليها اكتر وازاى ممكن يحققوها لما يكبروا
س- حصلت على العديد من شهادات التقدير من التلفزيون المصرى والمهرجان القومى للمسرح وغيرها قولنا ايه هى اعز واقرب جائزة لقلبك
ج- جائزة احسن ممثل صاعد عام 2007 من المهرجان القومى للمسرح فى دورته التانية عن مشهد واحد مدته 6 دقائق فى مسرحية
س – مين اقرب الفنانيين والفنانات الى قلبك واللى بتربطك بيهم صداقة
ج – النجم سمير غانم واحمد زاهر وبيومى فؤاد واحمد صيام وادوار ومحمود عبد المغنى ورامى وحيد وكريم محمود عبد العزيز والمرحوم عزت ابو عوف والمرحومه رجاء الجداوى دول الاقرب لقلبى والحمدلله علاقاتى مع الوسط اكثر من رائعة
س احكيلنا عن اطرف موقف اتعرضتله خلال مسيرتك الفنية سواء فى المسرح او التلفزيون
ج- اطرف موقف وقت تصوير مشاهد مباراة كرة القدم فى مرجان احمد مرجان مع الزعيم والمشهد تم تصويره على يومين وكان ملىء بالمفارقات الكوميدية
س حابب تقول ايه لجمهورك فى نهاية اللقاء الرائع ده
ج- استمتعت جدا بالحوار وكل سنة وكلكم طيبين وبخير وشكرا جزيلا

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى